தேதியைக் காணோம் !

தெற்கு பசிபிக் கடலில் இருக்கும் சமோவா என்ற தீவு தேசத்தில் வசிக்கும் மக்களுக்கு கடந்த டிசம்பரில் வெறும் 30 நாட்கள்தான். ஆமாம்..... அவர்களது நாட்காட்டியில் டிசம்பர் 30-ம் தேதியை அரசாங்கம் ரத்து செய்து விட்டது.

இந்த விநோதம் நிகழ்ந்ததற்குக் காரணம், ஏற்றுமதி - இறக்குமதி வர்த்தகம்.

ஆஸ்திரேலியா மற்றும் நியூசிலாந்து நாடுகளுக்கு அருகில் உள்ளது சமோவா தீவு. ஆனாலும், அமெரிக்க, ஐரோப்பா நாடுகளுடன் அதிகமாக வியாபாரம் செய்யும் நோக்கத்தில், அவர்களுக்கு ஒத்துப்போகுமாறு தங்கள் நாட்காட்டியை வடிவமைத்தனர். 119 ஆண்டுகளுக்கு முன்பு இந்த மாற்றம் நிகழ்ந்தது.

ஆனாலும், அவர்களின் பெரும்பகுதி வர்த்தகம் ஆஸ்திரேலியா மற்றும் நியூசிலாந்து நாடுகளுடன்தான்.


பக்கத்தில் இருக்கும் ஆஸ்திரேலியாவுக்கும், சமோவாவுக்கும் 21 மணி நேர வித்தியாசம். இதனால் ஏகப்பட்ட சங்கடங்கள். சமோவாவில் சனிக்கிழமையாக இருக்கும்போது ஆஸ்திரேலியாவில் ஞாயிற்று கிழமை. எனவே அன்று வியாபாரம் பாதிக்கும். அடுத்த நாள் சமோவாவில் விடுமுறையாக இருக்கும்போது ஆஸ்திரேலியாவில் திங்கள்கிழமை பரபரப்பாக வியாபாரம் நடந்து கொண்டிருக்கும்.


இப்படி இரண்டு வாரத்தில் இரண்டு நாட்கள் இழப்பைத் தவிர்க்க, 21 மணி நேரம் பின்தங்கி இருப்பதைவிட மூன்று மணி நேரம் முன்னால் போகலாம் என முடிவெடுத்தது அரசு. டிசம்பர் 30-ம் தேதியை அடித்து விட்டு, அப்படியே 29-ம் தேதியிலிருந்து 31-ம் தேதிக்குப் போய்விட்டார்கள். இப்போது இரண்டு தேசங்களிலும் ஞாயிற்று கிழமை ஒன்றாகவே வருகிறது.




தகவல் : லோகேஷ்.